Per a Libertà

1 – Tù chì sì stat’un ghjornu inghjuliatu per difend’a to libertà
Ùn pensà più ch’ai straziatu i to penseri lascia un pocu stà
Nùn ti lagnà più nant’u to passatu ti sì battutu per pudè megliu stà
E pens’appena ch’indè questu mondu ci sò chì morenu per a libertà

(Refrain) Veni cù mè porghji la manu hem’a cantà hem’a cantà
Perch’elle compiinu in lu mondu sanu
L’offese à la libertà.

2 – Ascolt’un pocu tù caru fratellu in certi lochi luntanu culà
Ci sò di l’omi chi si sò mess’arritti mà l’anu chjosi per l’eternità
Senza pudè difend’e so idee l’hanu tumbati senza pietà
Eranu tant’omi fieri e so morti per a libertà.

3 – E ghjè per quessa chì ti dicu un piantà mai di luttà
Canteremu per i nostri fratelli scunsulati per sempre culà
Ch’e nostre voce saltin’e fruntiere chì manc’un piombu le possi parà
Per falle sente scalend’in lu celu ci vole à luttà ci vole à luttà.